Intervju s Jurkoton

/Intervju s Jurkoton

Intervju s Jurkoton

-Imaginarni intervju s Jurkoton Pavičićen, bivšim trenerom N.K. Sloge (objavljeno u prvom broju Tartajuna)

Inače, Jurko kako si?

-A evo.

Ča ti se pari od ove sezone?

-A ča jo znon, ni još počela.

Ma ne turističke, nego sezone baluna?!!

-A to. Eeee, jesmo hi, a!

Je, jesmo hi. A koja je taktika bila presudna?

-Na buok! Na buok!

A kakovu taktiku možemo očekivot u budućnosti?

-Teško je sad o temu, ali mislin da će nova formacija 7-2-1 pokozat učinkovitost.

A  ča svituješ zodnjoj liniji, da treniro priko lita ili…?

-Žijenske, da budu manje nervoži.

Čujen iz izvorih bliskih upravi da čedu registrirat nikega Marokanca za na zodnjega bez da ga vididu, koje je tvoje mišljenje o temu?

-Bome ne moremo falit. Ne virujen da di imo koji gori od našega.

Znači svoju karijeru siguro nastaviješ grodit u Slogi?

-Istina… Sloga, bratstvo i jedinstvo mi je nojbitnije.

Ma ča se tiče kluba tvojega!

-Siguro, bome, dohodit ću tu i tamo na utakmice

Jurkotov susret s Joseom Mourinhom

A treninzi?

-A to… To bome ko i do sad… U dvi grupe, jer nos bude previše, bome tri puta na šetemonu, ko i uvik…

Tvoj stav prema upravi?

-Ma i ne kontaktiron baš često sa njima, ali za koga je dobra je?

Ovo putovanje ča ti ga klub ploćo priko lita, hoćeš ga iskoristit?

-Ma ko će to hodit pud Broča, a u stvari i ko bi se brini za reciklažu oglasih u Dolu.

A ča se tiče gostovanja kluba vonka otoka, čo sa tin?

-Ni bome čo hodit i vonka otoka se sramotit, bome moremo se i ovod dobro opit.

U kakovoj su formi igroči?

-Uf, koliko moredu popit.

Ma Jurko, u nogometnoj formi!

-(suzdržan – Jurko pije vodu.)

I???

-E, tot su moji igroči malo čudni, njima to sve ovisi do večeri pri utakmice, ako stojidu doma i pripremodu se onda igrodu ko pusi u deveti misec kad in posvitliš u oči, a ako večer bude kvalitetna i puna blagodati onda je to moja igra, tuo su moji mladići.

A ča ti se pari od Lovrića?

-Je to onin visoki ča igro u navalu?

Je, i?

-Aaaa, glavno da je boji od Šabana.

A zoč nis dovo šansu drugemu sinu?

-Je, sa ono guzic mogu mu dat šansu somo na balote.

Govori se da tvoj Tahi gre u nogometnu mirovinu?

-Je, je, istina, to son mu i jo savjetova.

Braća Selčani?

-Ne bi hi do za vriću frementuna.

A braća Luketin?

-Somi drogi Bog ih je poslo.

A ča govoriš o našemu nojbojemu strijelcu Karkoviću?

-Da Bog da i do godišća bi nojboji, somo neka fermo pit jer će klub u trošak.

Onin moli Šoretov?

-Dobar je, dobar, ni čo govorit, tarči ko lud, uf da je jos jednega onakega, a tek kad je njemu dobra subota tuo je čudo, ko navijen..

Je dopuštoš igročima seks i takove fizičke aktivnosti don pri utakmice?

-Dopušton, jer son sigur bome da to nećedu činit, a ako se komu i zalomi tega ni sutradon…

Jurko na početku blistave trenerske karijere

Po čemu je Sloga Dol dobar klub?

-Kako ne bome, svaki igroč koji hoće doć, bome mi ga primimo.

A kvalitete kluba?

-Klub je bome svakako kvalitetan… Obrana non ko bodljikava žica na tarmuntoni, bokovi i krila ko jarebice i galinace, vezna linija ko Jadrolinija usrid sezone, centar je za traumatologiju, napad je na prepad, a klupa čini čuda priko poluvremena…

Znači od Sloga se more jos puno očekivot?

-Je, je, tako je… “Sloga je stroj, a sve drugo je gnjoj!“

2019-10-14T09:35:05+02:00

Ostavite komentar